نماز کے بعد کیے جانے والے مسنون اذکار

 نماز کے بعد کیے جانے والے مسنون  اذکار :

رسول اللہ صلی اللہ علیہ وآلہ وسلم فرض نمازوں کے بعد جو اذکار کیا کرتے تھے وہ مختلف احادیث میں موجود ہیں۔ لہذا ہمیں بھی ان اذکار کو نماز کے بعد پڑھنا چاہیے۔ رسول اللہ صلی اللہ علیہ وآلہ وسلم کی پوری زندگی ہمارے لیے ایک بہترین مثال ہے جس طرح آپ نے اپنے رب سے مانگا ہے ہمیں بھی اسی طرح اپنے رب سے مانگنا چاہیے۔

لہذا بخاری شریف کی حدیث پاک کے الفاظ ہیں کہ:

نبی کریم صلی اللہ علیہ وسلم ہر فرض نماز کے بعد یہ کلمات پڑھا کرتے تھے:

 "لَا إِلَهَ إِلَّا اللَّهُ وَحْدَهُ لَا شَرِيكٍ لَهُ، لَهُ الْمُلْكُ وَلَهُ الْحَمْدُ وھو علی کل شئی قَدِيرٌ، اَللَّهُمَّ لَا مَانِعَ لِمَا أَعْطَيْتَ، وَلَا مُعْطِيَ لِمَا مَنَعْتَ، وَلَا يَنْفَعُ ذَا الْجَدِّ مِنْكَ الجدُ"

ترجمہ:

اللہ کے سوا کوئی عبادت کا مستحق نہیں، وہ واحد ہے اس کا کوئی شریک نہیں ہے اس کی سلطنت ہے اور اس کے لیے حمد ہے اور وہ ہر چیز پر قادر ہے۔ اے اللہ ! جو چیز تو عطا کرے اسے کوئی روکنے والا نہیں ہے اور جس چیز کو تو روک لے اسے کوئی دینے والا نہیں ہے اور کسی کوشش کرنے والے کی کوشش تیرے مقابلہ میں نفع نہیں دے گی۔

 نماز کے بعد کیے جانے والے مسنون  اذکار

اس حدیث سے معلوم ہوا کہ نمازوں کے بعد یہ ذکر کرنا مستحب ہے کیونکہ اس میں توحید کے الفاظ ہیں اور دینے روکنے اور تمام قدرت کے افعال اللہ تعالی کی طرف منسوب ہیں۔

نماز کے بعد کیے جانے والے اذکار کے بارے میں   دیگر احادیث:  

1 -                                                                                      کعب بن عجرہ بیان کرتے ہیں کہ رسول اللہ صلی اللہ علیہ وسلم نے فرمایا : نماز کے بعد پڑھے جانے والے کچھ اذکار ہیں ان کو پڑھنے والا نا کام اور نامراد نہیں ہوتا ہر نماز کے بعد تینتیس 33 مرتبہ سبحان اللہ کہے اور تینتیس 33 مرتبہ الحمد للہ کہے اور چونتیس 34 مرتبہ اللہ اکبر کہے۔

2 -                                                                                       حضرت ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: جس نے صبح کی نماز کے بعد سو 100 مرتبہ سبحان اللہ کہا اور سو 100 مرتبہ لا الہ الا اللہ کہا اس کے گناہوں کو بخش دیا جائے گا خواہ اس کے گناہ سمندر کے جھاگ کے برابر ہوں۔

3 -                                                                                                         حضرت ابو امامہ رضی اللہ عنہ بیان کرتے ہیں کہ رسول اللہ صلی اللہ علیہ وآلہ وسلم، نے فرمایا : جس نے ہر فرض نماز کے بعد آیۃ الکرسی کو پڑھا اس کو موت کے سوا کوئی چیز جنت میں داخل ہونے سے مانع نہیں ہے۔ (یعنی کہ اس کے اور جنت کے درمیان صرف موت ہی رکاوٹ ہے)

(ماخذ: شرح صحیح بخاری، للامام سعیدی علیہ الرحمۃ)